طرق للدفاع عن النفس ضد التحرش الجنسي و اللفظي
التحرش بقى حاجة منتشرة في المجتمعات العربية ، و بقى في كلام كتير عنها و حملات توعية ،آخر الحملات دي حملة ” ماتسكتوش ” ، كلام كتير سمعناه عن حوادث التحرش في الشارع و في الشغل و في كل مكان ، و في آراء كتير عن الموضوع ده ما بين ناس بتقول إن ده بسبب لبس البنات و ناس تانية بتقول ده عيب تربية و نقص أخلاق و ضمير وآراء تانية كتير ، بس سواء كان إيه هو السبب ده ، إحنا كبنات المفروض نتعلم إزاي ندافع عن نفسنا في حالة إننا تعرضنا للتحرش سواء كان لفظي أو جسدي …
أول حاجة لازم تعمليها إنك تبقي فاهمة إن المتحرش ده جبان بيعمل عملته و بيجري
ممكن تستخدمي صوتك كدفاع عن نفسك ، معروف في مجتمعنا إن صريخ البنت ده معناه إن في كارثة حصلت
ممكن تدافعي عن نفسك عن طريق إنك تضربيه شلوت أمامي بين رجليه و بكده تكوني خدتي حقك منه و شلّتيه مش هيقدر يتعرضلك تاني
في بنات كانت بتعمل رذاذ مكون من مياه بصل و فلفل أسود و ده ميزته إنه بيتعمل في البيت عادي
كمان ممكن تشيلي معاكي دبوس من بتوع الطرحة مثلاً ، عشان لو مد إيده ترشقيه فيها على طول أو في أي مكان تطوليه
في دلوقتي صالات و نوادي رياضية كتير بتعلم فنون الدفاع عن النفس
وممكن تصوتي و تقولي إنه حرامي ولما الناس تمسكه و تضربه تسلميه للشرطة و تعمليله محضر تحرش
في حالة معاكسات التليفون في طرق جديدة بقى و أنا عن نفسي بعملها ، إنه بعد ماتعمليله حظر على تليفونك تسجليه بإسم متحرش على برنامج ” true caller ” ، وممكن تاخدي رقمه و تعملي إعلان على ” دوبيزل ” بأي حاجة و يكون سعرها رخيص ، تليفونه مش هيبطل رن ، في كمان صفحات على الفيس بوك ضد التحرش ممكن تاخدي صورة للشاشة و الكلام و الرقم و تنزليها عليه و الولاد بيقوموا بالواجب معاه
في طريقة كمان إنك لو في مواصلات مثلاً تصوريه و تفضحيه على الفيس بوك و مواقع التواصل الإجتماعي يمكن توصل لحد من قرايبه أو زمايله في الشغل و يعرفوا إنه متحرش
أهم حاجة ماتخافيش و خليكي واثقة في نفسك و خدي حقك